رحلتي مع حملة (العاشر من رمضان)0
عزيزي الزائر ناسف كثيراً لتأخرنا في المواضيع لكن موضوعنا اليوم مميز للغاية فهو حدث عشته لحظة بلحظة أترككم مع هذا الحدث:

ركبنا من القاهرة الساعة السادسة صباحا ووصلنا الى الاسماعيلية فى حوالى التاسعة صباحا, قام الأمن بوقف الحافلات وسحب الرخص من السائقين وهددهم ومنعهم من إكمال الطريق ,
ونزل من الحافلات شباب 6ابريل وحزب العمل وتوسدوا الأرض ومنعوا حركة السيارات
, وأخذت الهتافات تعلوا تنديدا واستنكار لمنعهم من الوصول إلى حدود غزة . ظل الوضع هكذا
الى الساعة الثانية ظهراً ونحن على مدخل الاسماعيلية وبعد ذلك هدات الحركة قليلا ثم تفرق الجميع ,
،منهم من رجع الى القاهرة ومنهم من أكمل الطريق بمفرده وكنت أنا واثنين معي هما م/محمود و أ/محمد من (المنصورة)ثم ركبنا سيارة نقل ووصلنا الى موقف الإسماعيلية ثم جلسنا قليلا وركبنا مرة أخرى ووصلنا إلى العريش عند آذان المغرب وهناك استقبالنا اخ فاضل عبدالرحمن سامى مواطن من العريش وذهبنا معه الى مطعم ووجدنا هناك( أ/مجدي حسين) ثم ذهبنا بعد ذلك الي شاليه على البحر لكى نستريح من السفر قليلاً ولكى نذهب الى رفح فى الصباح ولكن قررنا نحن الاربعة (عبدالرحمن و محمد و محمود وأنا) أن نذهب فى الليل ثم اتصل عبدالرحمن بصاحب اسمه( أحمد ) لكى يجهز لنا سيارة كى تنقلنا الى رفح .
وبعد ذالك ركبنا السيارة ومشينا فى طريق موازى للطريق الرئيسى حتى لانمر بكمين من الشرطة وبعد ذلك وصلنا الى رفح وعندما وصلنا سمعنا أن خمسة اعتقلوا من العريش
ثم ذهبنا الى بيت رجل فلسطيينى على الحدود المصريه
اسمه (تامر) تناولنا عنده مشروب ثم عدنا الى المنصورة من حيث أتينا
أترككم مع الصور:

مقر التجمع

فى الاتوبيس

وبدات قوات الامن تهل الى المكان



وتحمس الشباب

ويرصهم قائدهم


بنات ... وقفوا ولم يخافوا


Freedom 4 gaza

يابنى قوم


اللى على اليمين ده محمود واحنا كنا رايحين موقف الاسماعيلة وانا اللى بجانبه اثناء ركوبنا سيارة النقل

عندما وصلنا العريش وتقابلنا مع أ/مجدى حسين ومجموعه من الشباب

على اليمين الاخ اللى من العريش واللى بعده ده أخ اردنى اسمه جعفر واللى بعده أ/محمد وبعدين أنا اثناء وصولنا على الشاليه فى العريش

عندما ركبنا سيارة لكى نذهب الى رفح عن طريق الجبل

انا اللى واقف تحت والثانى من على اليمين ده الاخ تامر من حماس واللى على الشمال ده الاخ اللى من العريش

ودى كانت اول مجموعة استطاعت الوصول الى رفح

وان احنا الوحيدين اللى وصلنا فى يومها

الباقى وصل تانى يوم

ودى اخر صوره التقطها فى رفح

31 Responses
  1. السلام عليكم ورحمة الله وبركاته

    أنا مصعب
    كنت معاكم في القافلة
    كنت راكب في الأتوبيس الأصفر الكبير اللى كان فيه أحمد الكردي والأستاذ أسامة عز العرب .
    ياريت لو عندك صور تبعت لي على الميل كل الصور اللى عندك
    وياريت تكون بأعلى جودة ممكنة
    ضروري جدا
    الميل بتاعي
    abo.osama1@gmail.com

    جزاكم الله خيرا
    والسلام عليكم ورحمة الله وبركاته


  2. جعله الله في ميزان حسناتكم

    تحياتي


  3. رائع يا بودي
    يا ريت تكتب لنا موضوع عن الرحله من أول الفكرة إلي لحظة العودة
    وفقكم الله
    أشرف معوض


  4. ربنا معاك يا عبده

    الحمد لله انك رحت رفح

    ومش شفتك علي شريط الاقصي زي ما فهمتك

    للاسف

    :p


  5. جوجو Says:

    السلام عليكم

    حمدلله على السلامة

    كل سنة وانت طيب

    بجد البوست جميل وشامل لكل اللى حصل

    ربنا يوفقك


  6. قولهم يا عبده ان احنا اول ناس وصلنا رفح مش بتووع غاضبون
    اعلن عن القافله الاخوان وكان الاخوان اول من وصلوا
    عموما نورت العريش


  7. محمود السعداوى Says:

    صحيح يا عبده

    قول ان احنا اول ناس وصلنا الى بوابة صلاح الدين ..

    بصراحة كانت رحلة اكثر من راااائعة واستفدت استفادات كبييييييرة جدا منها

    ده كفاية ان انا كنت مع واحد زى السكر زيك يا عبده

    كمان احب احييك بشدة على اصرارك انك تكمل الرحلة معايا انا ومحمد رغم ان دى كانت اول مرة نشوف بعض فيها

    وانك رفضت تنزل من العربية زى ما حسام عمل .. عموما هو ندم بعد كده

    وبلاش تغيظه بقى عشان هو من غير حاجة مفقوووووووووع


    عموما عقبال الرحلة الجاية يا جميل وندخل غزة بقى ان شاء الله سوا

    اه بالحق

    اوعى تقول لحد على البتاع اللى اتقطع


  8. الف مبروووك ياعبدو
    على انك رحت ووصلت وعملت الي كنت عاوزة

    والف مليووون مبروووك على وصولك بالسلامه

    واكيد انت عارف قد ايه كل واحد كان فرحاااااان انك رجعتلنا بالسلامه رغم كل الحجات اللي واجهتك

    وقد ايه الواحد اما حد يكلمه عن الحمله دي يقول بكل فخر ..ان واحد مننا كان فيها

    والله انا سعيييده جداااااا
    انك رحت لهناك
    وفرحانه اكتر برجوعك لنا بالسلامه
    وبالموضوع الجامد ده (شايف كمية التعليقات اللي هبة مرة واحده ) كانت رحله جميييييييله رغم الصعوبااات الي واجهتك ..الصيام والمطارده ..ومحاولة..(ربنا يحميك)

    وانت كده الرحلة دي تكتبها في صفحات التاريخ عندك ..بس تعتبر رحله مش كاملة الاهداف
    لانك كنت عاوز تدخل لغزة من جوة

    ربناا يبارك فييك ويحفظك ..ويجعلك جندي من جنود الله في ارضه يا (فارس القسام)

    اعتقد دي اول تجربة في حياتك انك تسافر لوحدك ..وكمان بالصعوبات دي

    اللــــف تحيه ..واللــف شهاده شكر لا شهااااداات ..تستحقها

    قدااامك طريق طوووويل لسه (طريق الخير مش مفروش بالورد)...

    **شـــــد الهـمه الاسـلام مسـتــنيــك**

    سارة


  9. Rima Says:

    اخواننا الافاضل ::
    ____ عبد الهادي
    _____ م / محمود السعدوي
    ______ أ / عبدالرحمن سامي

    حقٌ لكمـ اليوم ان نفرحوا وليس اي فرح
    تخيلت نفسي في نفس موقفكم واحسست بـ ....
    .

    .

    .

    ولكن يبقي تخيل فهنيئا لكم جميعا حقا هنيئا لكم " هذا فضل الله يؤتيه م يشاء " وماكان هذا الا اصطفاء من الله عز وجل لكم جميعا فنيهأ لكم فأنتم في نعمة ومنة من الله تعالي

    حقٌ لكمـ اليوم ان تفخروا بانفسكم
    وحقٌ علينا ان نفخر بكمـ

    ملحوظه ::::

    مش الاخ حسام بس الي مفقوووووووع

    في ناس مش طلعت اصلا خالص وحضراتكم عمالين تحكوا عن كل التفاصيل
    أكيد مش هيكون الاخ حسام بس يعني

    ــــــــــ

    ويبقي يقيننا بالله _ عز وجل _

    ان يكتب لنا رباط ع ارض غزة واستشهادا في سبيله لتحريرها

    ألا ان نصر الله قريب

    بارك اللهم لكم وبكم وفيكم

    ومن حسن صفاؤه وجب اصطفاؤه

    فهنيأ لكم هذا الاجر العظيم

    تمنيتم فاخلصتم فعملتم فأحسنتنم فصدقتم الله فصدقكم

    ما اقتناء المناقب الا باحتمال المتاعب

    تعبتم وهذه هديتكم من الله تعالي

    __ اللهم اكتبها لنا جميعا وتكون حتي المسجد الاقصي ويكون لقاؤنا بك مع الصديقين والشهداء والصالحين

    بــــوركتم جميعا

    أختكم ::: ريمــــا


  10. حسام يحى Says:

    عبد الهادى


    ايوه ياعم الواصل

    عقبالنا


    ادعيلى بقا
    كان زمانك لسه فى رمسيس :P عند المترو

    ..........

    ردى على الاخ السعدوى والاخت ريما قريب

    ايوه ياعم شكلى هاعمل حرب عندك بس اصبر عليا


  11. أشكرك على مرورك

    اخى مصعب والصور موجوده فى المدونه


  12. اخوانا الفاضل : احمد سعيد
    شكـــــــرا جدا علي المرور
    شرفتنا يافندم
    وجزاكم الله خيــــــرا

    بوركتـــــم


  13. أخونا الفاضل:الندقيه

    جزاك الله خيراً


    والموضع بالتفصيل الممل على منتدى عيون الطلبه http://www.forums.talabaeyes.com/showthread.php?t=17630


  14. أخى الفاضل حسن

    ان شاء الله هتشوفنى المره القادمه علي شريط الاقصي


  15. ربنا يكرمكم ويجعله فى ميزان حسناتكم

    والحمد لله على رجوعكم بالسلامة

    جزاكم الله خيرا


  16. شكراً لكى اخت جوجو

    وكل سنه وانتى طيبة


  17. عندك حق أخى قسماً سأنتصر

    ااه من حق العريش كانت من وره بيه صح ههههههههههههههههه

    ربنا يبارك فيك اخى وشكراً على مضيفتك لنا فى العريش


  18. عندك حق أخى قسماً سأنتصر

    ااه من حق العريش كانت منوره بيه صح ههههههههههههههههه

    ربنا يبارك فيك اخى وشكراً على مضيفتك لنا فى العريش


  19. أشكرك أخى م/محمود و كويس انى اتعرفت على واحد محترم مثلك

    انا مش عاوز اقول ان البنطال اطقطع سرك كبيييييييييييير هههههههههه


  20. شكراً ليكى سارة على الكلام الحلو ده


    ربنا يوفقق ويجعلك نصرة للاسلام يااارب


  21. EMMY BABY Says:

    بجد بجد

    جزاكم الله خيرا قمة الفرحة لما تحس انك بتعمل خير وتكون سبيل فى مساعدة جد

    المهم حمد الله على سلامتك وسلامة الجميع

    ويارب تكون فى ميزان حسناتكم ان شاء الله

    تحياتى

    ايمى


  22. شكراً لمرورك أخت ريما

    ويارب يكتب لنا الرباط على ارض غزة امين امين


  23. اختى أختكم فى الله

    جزاكى الله خيراً

    تحياتى


  24. ازيك يا عبده ... اخبارك ايه يا كبير ... هههه وصلتوا اول ناس ياعم ... مبروك يا سيدى وصلنا احنا قبليكم ... هههه
    اخبارك ايه يا كبير والله انتوا عيال تشرح القلب بجد بجد انا باحبكم فى الله ...
    وباذن الله نبقى مع بعض فى القافله الجايه باذن الله


  25. Baatooooot Says:

    السلام عليكم
    ماشى ياعم هنيالك
    بس كويس بانك حولت تحقق هدفك
    شكرا


  26. همسة Says:

    بجد مش عارفة اقول أية
    غير ربنا يبارك فيكم
    وأكيد لسة الامل موجود وهيجى يوم ونصلى كلنا فى المسجد الاقصى
    تقبلوا مرورى


  27. اقول اية ؟؟
    لا حول ولا قوة الا بالله


  28. tote Says:

    السلام عليكم
    كان نفسى اكون موجودة فعلا
    ربنا يبارك فيكو ويقويكوا يا رب
    ويكتر من امثالكم


  29. Batoooot Says:

    السلام عليكم
    ياعم ياعم كل ديه تعليقات مشيه معاك
    شكرا


  30. مسلم مصري (وهذا يكفي) Says:

    استفز عنوانها مشاعري ، فهو قوي ذو صدى . وسريعا ما كانت المدونة أمامي .
    هي كغيرها الكثير تكاد تكون أقرب إلى نافذة دعاية منها إلى مدونة. فصاحبها (أو أصحابها) غالوا كثيرا في وضع الصور والشرائح المصورة ، وكذلك اللافتات التي تحمل شيئا من أدعية وأحاديث تجاورها شعارات بعضها عام والكثير منها خاص يُفضي إلى فئة بعينها.

    وأتساءل ...
    منذ متى والكاتب - أي كاتب - يقوم إلى كتابهِ أو مجلده أو صفحته أو مدونته فيملؤها بالغث والثمين من أمور هي بعيدة كل البعد عن الكلمة وتفرعاتها؟

    صاحب المدونة كذلك لا يدرك أن الدين - إسلامنا بالطبع - لا يتجزأ. فهو وإن كان يفخر بانتماءه إلى فئة أو جماعة إسلامية شعارها : الإسلام هو الحل ، نراه يُسمِعنا ملفا صوتيا هو أغنية ما . وهذا في حد ذاته يمثل قمة التناقض. إذ أن الإسلام - الذي تتخذه جماعته شعارا لها - حرّم تماما سماع الأغاني والمعازف .

    وإن كانت هذه بوادر ملاحظاتنا ، فإن موضوعه "رحلتي مع حملة (العاشر من رمضان)0" والذي وصفه بالمميز ، يستحق منا الكثير من التوقف .
    بداية لستُ أرى علاقة لجملة العنوان كلها بالأحداث . (إلا إذا أراد أن يوضح بها أن رحلته تمت في يوم العاشر من رمضان) ؟؟
    كذلك فالكاتب لم يتطرق إلى الغرض من رحلته هذه. فمن المنصورة إلى الإسماعيلية مرورا بالعريش انتهاءً برفح ، لم يتحدث الرجل إلا عن أشخاص وأزمنة وسُبُل اتخذوها في رحلتهم ثم أتحفنا بقليل من صور له ولمن كان معه . كل هذا قبل أن يقفلوا عائدين من حيث أتوا !!

    أما بالنسبة للتعقيبات فأنعم بها وأكرم . فجميعها اتفقت على أن الرحلة كانت لرد القدس . لدرجة أن هناك من وضح في تعليق له بأنهم كانوا أول من رفع راية " لا إله إلا الله ، محمد رسول الله " فوق قبة الأقصى الشريف قبل مجموعة غاضبون !! ولا حول ولا قوة إلا بالله .

    نهاية .. فإلى هؤلاء أقول : لو صدقتم فيما تتشدقون به من صفات وشعارات ، فما الذي أتى بكم مرة أخرى إلى دياركم بعد أن كانت الأرض المحتلة قاب قوسين أو أدنى منكم. أم أن (شريط الأقصى) وُضِع للذهاب والتفرج عليه وفقط !؟
    كفانا كلاما وأمنيات براقة وفُرجة ، فهؤلاء – أبدا – لن تُرَد بهم الأرض ولن يُغير بهم الواقع ...

    وقديما أتى أحدهم حكيم إسبرطة هاتفا في فرح طفولي : لقد ذهبتُ يا سيدي إلى حيث تعسكر جحافل الفرس المُغيرة وَ ......
    قاطعه الحكيم قائلا : وما الذي فعلته هناك ؟
    أجابه الرجل دون إبطاء : رأيتهم وعُدت ..
    فنظر إليه الحكيم نظرة خاوية بلا أي معنى وقال له موليا إياه ظهره : (برافو) .....


    محمد المهدي


  31. أخي الصغير عبد
    ما شاء الله فكر ناضج وطريق جميل في التعبير عن نفسك وعن آراءك على الرغم من صغر سنك
    أيضا أهنئك على قوة إيمانك وقوة قلبك ومحاولاتك الجريئة في الوصول إلى غزة ..ما شاء الله
    والصور خير دليل على الموضوع
    بارك الله فيك .


التااريخ

التااريخ
تعريب وتطوير طلاب من أجل مصر